Virkt umferðareftirlit við Eyjafjörð

Lögreglan á Eyjafjarðarsvæðinu stöðvaði í síðustu viku 823 ökumenn á Akureyri, Dalvík, Ólafsfirði og Siglufirði, en undanfarið hefur lögreglan verið með sérstakt eftirlit með ölvunar- og vímuefnaakstri þar. Af þeim er einn ökumaður grunaður um að hafa verið ölvaður við akstur og annar að hafa verið undir áhrifum vímuefna. Þá kom í ljós að 34 ökutæki voru ekki með ljósabúnað í lagi og 103 ökumenn ekki með ökuskírteini sitt meðferðis. Þetta kemur fram á vef lögreglunnar.