Tilbúinn í stríð við Ísrael

Leiðtogi Hizbollah-hreyfingarinnar í Líbanon segist reiðubúinn í stríð við Ísraela kjósi þeir átök. Einn af máttarstólpum Hizbollah féll í árás í vikunni. Hreyfingin segir Ísraela hafa myrt hann en því hafna Ísraelsmenn.

Hizbollah-liðar eru æfareiðir vegna dauða Imads Mughniyah þegar bílsprengja sprakk í Damaskus í Sýrlandi á þriðjudagskvöldið.

Moughniyah var í felum í mörg ár en hann var lengi efstur á listum Bandaríkjamanna og Ísreala yfir eftirlýsta menn, sagður hafa skipulagt og staðið á bak við fjölmörg morð og mannrán á níunda áratug síðustu aldar. Hann var borinn til grafar í Beirút í Líbanon í gær.

Hizbollah-liðar segja Ísraela hafa myrt hann. Í ræðu sagði Sayyed Hassan Nasrallah, leiðtogi hreyfingarinnar, að ef Ísraelar vildu átök þá yrði þeim að ósk sinni.

Ísraelar segjast ekki hafa myrt Mughniyah. Þeir hafa hert öryggisgæslu í sendiráðum sínum um allan heim og aukið viðbúnað við landamæri sín að Líbanon.