Tvær af Norðurlandaþjóðunum styðja sjálfstæði Kosovo

Danir og Finnar eru meðal þeirra Evrópusambandsþjóða sem vilja viðurkenna sjálfstæði Kosovo-héraðs fljótt en Svíar hyggjast ræða málið í næsta mánuði.

Fram hefur komið að Evrópusambandið sé klofið í afstöðu sinni til málsins. Frakkar, Þjóðverjar, Bretar og Ítalir hyggjast allir viðurkenna sjálfstæði héraðsins en Spánverjar eru meðal þeirra sem andvígir eru, meðal annars af ótta við viðbrögð í Baskahéruðum sínum.

Ingibjörg Sólrún Gísladóttir utanríkisráðherra hefur látið hafa eftir sér að haft yrði samráð við norrænu ríkin í málinu en ef marka má fréttir dagsins eru tvö af norrænu ríkjunum þegar ákveðin.

Haft er eftir Per Stig Möller, utanríkisráðherra Danmerkur, að Danmörk muni viðurkenna sjálfstæði Kosovo síðar í vikunni. Þá segir á vef finnska blaðsins Huvudstadsbladet að þarlend stjórnvöld séu í hópi þeirra ríkja sem vilji lýsa yfir stuðningi við Kosovo fljótlega.

Svíar hyggjast hins vegar bíða eilítið og fram kemur í sænskum miðlum að utanríkismálanefnd sænska þingsins muni ræða málið 4. mars. Ekki liggur fyrir hver afstaða norskra stjórnvalda er í málinu.