Hljóðlaus geisladiskur mest seldur

Lag sem eyra mannsins nemur ekki er nú mest selda lagið á Nýja Sjálandi. Unnið er að útgáfu lagsins á alþjóðavettvangi. Jólalagið „Heims um ból" var tekið upp á tíðni sem aðeins hundar nema og gefið út í fjáröflunarskyni fyrir samtök sem berjast gegn ofbeldi gegn dýrum.

Reuters fréttastofan greinir frá því að lagið hafi farið efst á sölulista fyrir jólin. Það hefur þó fengið misjöfn viðbrögð hlustenda. Samtökin segja versta tilfellið hafa verið hund sem réðist á útvarpið þegar lagið var spilað og eyðilagði það. Í flestum tilfellum hafi hundarnir þó einungis lagst niður og hlustað.

Kona nokkur sagðist á vef Ananova hafa hækkað mjög í tækinu þegar hún spilaði diskinn og þá hafi hundur hinum megin við götuna brjálast.

Rúmlega ein milljón íslenskra króna hefur safnast með sölu disksins.