Þrjátíu særðust í óeirðum við sendiráð Bandaríkjanna í Belgrad

Reiknað er með því að Bandaríkin og fjölmörg ríki Evrópusambandsins viðurkenni í dag sjálfstæði Kosovo frá Serbíu. Því var lýst yfir einhliða í gær. Minnst þrjátíu særðust í óeirðum við bandaríska sendiráðið í Belgrad, höfuðborg Serbíu, í gærkvöldi.

Helmingur hinna særðu er lögreglumenn. Serbar eru afara ósáttir við þá ákvörðun Kosovo-Albana að lýsa yfir sjálfstæði. Þeir líta á héraðið sem órjúfanlegan hluta Serbíu.

Þrátt fyrir að Kostunica forsætisráðherra hafi hvatt landa sína til að mótmæla með friðsamlegum hætti var sendiráð Bandaríkjamanna í Belgrad grýtt í gærkvöldi. Neyðarblysum var einnig skotið að því. Lögreglan hélt mótmælendum í skefjum og hrakti þá frá sendiráðinu með táragasi, gúmmíkúlum og hvellsprengjum.

Á meðan fögnuðu langflestir íbúar í Kosovo sjálfstæðinu langt fram á nótt. Hashim Tachi, forsætisráðherra, sagði í morgun að hann ætti von á viðurkenningu fjölmargra vestrænna ríkja í dag. Fastlega er búist við að Bandaríkjamenn viðurkenni sjálfstæði Kosovo í dag og síðan stórveldin í Evrópusambandinu. Grikkir, Kýpurbúar, Rúmenar og Spánverjar eru tvístígandi. Utanríkisráðherrar ESB ríkja ræða málið á fundi í Brussel í dag.

Öryggisráð Sameinuðu þjóðanna er klofið í málinu. Rússar óskuðu eftir fundi í gærkvöldi þar sem þeir létu í ljós þá skóðun sína að ógilda ætti sjálfstæðisyfirlýsinguna. Fulltrúi Rússa í ráðinu sagði enga ástæðu til að breyta ályktun frá 1999 um stöðu Kosovo þar sem stjórn héraðsins var sett í hendur Sameinuðu þjóðanna. Fulltrúar Bandaríkjamanna, Belga, Breta, og Frakka sendu frá sér sameiginlega yfirlýsingu þar sem þeir sögðu stöðu mála breytta frá því sem hafi verið fyrir níu árum.

Kínverjar vilja fara hægt í sakirnar og hvetja til þess að Kosovo-Albanar setjist aftur að samningaborðinu með Serbum og semji við þá um framtíð Kosovo. Aftur verður fundað um málið í ráðinu síðar í dag.