Leitar allra leiða til að forðast uppsagnir

Markmið forstjóra Landspítalans er að forðast uppsagnir starfsfólks þrátt fyrir kröfu um mikinn niðurskurð. Kjarnastarfsemi spítalans verður ekki skert við niðurskurð. Verkefni sem falla utan hennar gætu verið boðin út á næstunni.

„Ég get ekki lofað því á þessum tímapunkti að allir haldi vinnunni. Mitt markmið hins vegar er að það komi ekki til uppsagna,“ segir Hulda Gunnlaugsdóttir, forstjóri Landspítalans. Mannekla er ekki lengur vandamál á Landspítalanum. Fagfélög starfsmanna hafa efast um að mögulegt sé að ná niður verulegum niðurskurði án uppsagna og skertrar þjónustu.

Hagræðing innan Landspítalans stendur sem hæst enda eru fjárframlög skorin niður um tæplega tvo milljarða í breytingartillögum við frjárlagafrumvarp næsta árs. Mikil áhersla er lögð á tilfærslu legudeildarþjónustu til göngu- og dagdeilda, en þannig er hægt að fækka starfsfólki á kvöld- og næturvöktum og minnka yfirvinnu. Rekstur á endurhæfingar- og öldrunardeildum er til skoðunar. Bráðamóttaka Landspítalans á Hringbraut verður færð niður í Fossvog. Þá er verið að skoða innkaup stofnunarinnar í samstarfi við aðrar heilbrigðisstofnanir.

„Við erum svo ekki síst að skoða hvað aðrir geta gert jafn vel eða betur en við,“ segir Hulda. „Kjarnastarfsemi sjúkrahússins er meðhöndlun sjúklinga. Við skoðum því allar hugmyndir um rekstrarsparnað út frá okkar sérþekkingu. Hagræðing þýðir að starfsfólki verður boðin vinna á öðrum stað innan sjúkrahússins en það starfar núna.“

Hulda segir að útboð verkefna, sem lúta ekki að kjarnastarfsemi sjúkrahússins, sé til skoðunar. „Þegar við tölum um hugsanleg útboð verkefna, svo ég sé alveg hreinskilin, þá getur það þýtt atvinnumissi þeirra sem starfa á okkar vegum að viðkomandi verkefnum. Í útboði væri hins vegar mögulegt að taka tillit til okkar starfsfólks.“

Mannekla hefur verið viðvarandi vandamál á heilbrigðisstofnunum um alllangt skeið en Hulda segir að svo sé ekki lengur. „Menntað starfsfólk flykkist að spítalanum sem auðveldar okkur mat á því hvaða verkefni eiga að vera í forgangi og hvað er hentugur starfsmannafjöldi. Þetta var ekki hægt áður.“

Fagfélög lækna, hjúkrunarfræðinga og sjúkraliða hafa lýst yfir efasemdum um að hægt sé að komast hjá uppsögnum ef framlög til heilbrigðismála verða skorin verulega niður. Nú er fyrirséð að niðurskurðurinn verður um sjö milljarðar ef breytingartillögur við fjárlagafrumvarpið verða samþykktar. Læknafélag Íslands hefur fullyrt að kreppan kalli á aukin framlög til heilbrigðismála.

svavar@frettabladid.is