Íslendingar viðurkenna sjálfstæði Kosovo

Í kjölfar sjálfstæðisyfirlýsingar Kósóvó frá 17. febrúar síðastliðinn hafa íslensk stjórnvöld ákveðið að viðurkenna sjálfstæði Kósóvó. Ekki liggur fyrir endanleg ákvörðun um dagsetningu, eftir því sem fram kemur í tilkynningu frá utanríkisráðuneytinu.

Í tilkynningunni kemur fram að hafa beri öryggi og stöðuleika á svæðinu að leiðarljósi, einkum í ljósi þeirra átaka og ofbeldisverka er lagt hafi líf hundruða þúsunda í rúst.

Þá segir að í sjálfstæðisyfirlýsingu Kósóvó felist skýr skuldbinding um að virða mannréttindi og rétt minnihlutahópa. Mikilvægt sé að sú skuldbinding verði virt. Jafnframt sé ljóst að varanlega lausn á ólíkum sjónarmiðum Kósóvó-Albana og Serba verði að finna og sé miður að ekki hafi náðst samkomulag á grunni tillagna Martti Ahtisaari, sáttasemjara Sameinuðu þjóðanna. Miklu máli skipti að alþjóðasamfélagið styðji áfram uppbyggingu í Kósóvó og stuðli að varanlegum friði á Balkanskaga.

Þá segir að vegna hinna sérstöku aðstæðna í Kósóvó muni viðurkenning á sjálfstæði þess ekki hafa fordæmisgildi.