Ellefu bilaðir bílar, ónýtar græjur og líkamsárás

„Við þorum ekki að kaupa okkur flugvél. Það er á tæru," segir Böðvar Rafn Reynisson, söngvari Dalton. Á því ári sem hljómsveitin hefur starfað hefur hún farið í gegnum ellefu bíla og græjur eyðilagst í gríð og erg. Botninum var svo náð um páskana, þegar söngvarinn var skorinn á háls og kviknaði í hljómsveitarrútunni.

„Það hefur ekki liðið helgi án þess að bíll eða magnari hafi bilað, eða heilu toppasettin sprungið af einhverjum óskiljanlegum ástæðum," segir Böðvar. Hann tekur sem dæmi nýlegan Ford Transit sem hljómsveitin fjárfesti í. Bíllinn var enn í ábyrgð og töldu hljómsveitarmeðlimir sig líklega nokkuð örugga. Það var þó ekki brugðið út af vananum, því vélin í bílnum fór í jómfrúarferðinni austur á Egilsstaði. Hljómsveitin hætti sér því í fyrsta og eina skiptið öll saman upp í flugvél á leiðinni til baka. Sú ferð gekk áfallalaust, en í staðinn bilaði bíll eins hljómsveitameðlimsins við komuna til Reykjavíkur.

„Við þyrftum helst að ferðast með lífverði, slökkviliðsmenn og bifvélavirkja," segir Böðvar, sem er þó bjartsýnn á framhaldið. Dalton halda afmælistónleika á Players á föstudagskvöldið, og eru sannfærðir um að þar með sé vandræðunum lokið. „Við erum fullir bjartsýni um að þetta séu tímamótin. Þetta hefur verið verið að koma í smáskömmtum og svo komu þessir stóru skellir um páskana. Við náðum ári, og lítum því svo á að við séum ósigrandi," segir söngvarinn að lokum.