Löggan í Village People komin af spítala

Victor Willis, löggan í Village People og upprunalegi aðalsöngvari sveitarinnar, fékk að fara af spítala í San Diego í gær eftir velheppnaða aðgerð á raddböndum.

Læknar hafa sagt Willis að hann megi ekki syngja næstu níutíu daga en hann hefur hins vegar fengið röddina aftur og hljómar hún „næstum eðlilega“ samkvæmt talsmanni söngvarans.

Willis var einn af stofnmeðlimum Village People sem var ein þekktasta hljómsveit diskótímabilsins en hann samdi og söng tvo þekktustu slagara sveitarinnar, YMCA og Macho Man. Willis hætti hins vegar í sveitinni árið 1980.