Annað innbrotið hjá úrsmiði á rúmum mánuði

Þjófarnir sem brutust inn í verslun Hermanns Jónssonar úrsmiðs í nótt komust á brott með úr fyrir um tvær milljónir króna að sögn Jóns Hermannssonar úrsmiðs. Þetta er í annað sinn á rúmum mánuði sem dýrmætum munum er stolið úr versluninni.

„Þetta voru dýr úr af gerðinni Raymond Weil og Revue Homme og ég held að verðmæti þeirra nemi samtals um tveimur milljónum króna," sagði Jón Hermannsson þegar Vísir náði tali af honum í versluninni í morgun. Eins og fram hefur komið brutust tveir menn inn í verslun Hermanns Jónssonar við Ingólfstorg og höfðu á brott með sér á bilinu 20-30 úr.

Aðspurður segir Jón að dýrasta úrið hafi kostað um hálfa milljón króna. „Þeir hafa farið í tvo glugga og tæmt úr þeim og farið þannig í dýrustu úrin. Það náðust hins vegar góðar myndir af mönnunum í öryggismyndavél og svo það er vonandi tímaspursmál hvenær þeir nást," segir Jón.

Aðeins er rúmur mánuður síðan þjófar voru síðast á ferð í versluninni, en þá höfðu þeir á brott með sér demanta fyrir á fimmtándu milljón króna að sögn Jóns. „Það var mikill hasar og þar vann lögreglan mikið stórvirki," segir Jón.

Í frétt sem birtist á Vísi af málinu þann 24. febrúar kemur fram að sést hafi til manns að morgni þess dags úr eftirlitsmyndavél að brjóta rúðu í versluninni. Lögregla var með mannskap skammt frá og var hann þegar sendur á staðinn. Þegar vettvang var komið var maðurinn sem sést hafði til að setja inn á sig muni úr gluggaútstillingu verslunarinnar.

Lögreglumenn gerðu sig líklega til að handtaka manninn en í sömu mund tók hann á rás, hljóp að Ráðhúsinu og inn á Suðurgötu þar sem bíll tók hann upp í. Honum var ekið á ofsahraða eftir Suðurgötu og fékk lögregla ábendingu um að bílnum hefði verið lagt í Skerjafirði. Þar voru tveir menn á þrítugsaldri gripnir á gangi með demantana í fórum sínum.

Aðspurður segr Jón að verslunin sé ágætlega tryggð fyrir þjófnuðum sem þessum en hann vonast til að úraþjófarnir náist sem fyrst.