Madonna og A-Rod nálgast

Samband Madonnu og hafnaboltaleikmannsins Alex Rodriguez virðist allt að því óumflýjanlegt. A-Rod, eins og hann er kallaður í Bandaríkjunum, sat á fremsta bekk á tónleikum söng­dívunnar í Miami og virtist kunna því vel. Enda sat sjálft poppgoðið Rod Stewart honum á hægri hönd. Madonna virðist kunna þá list manna best að senda tvíræð skilaboð. Madonna sagði, áður en hún flutti lagið I’m So Far Away, að allir ættu að þekkja þá tilfinningu að vera ástfanginn í fjarbúð.

Nærstaddir þóttust einnig greina að þau Madonna og A-Rod hefðu skipst á ástríðufullum augnagotum á meðan á flutningi nokkurra rómantískra laga stóð á tónleikunum. Hvernig svo sem menn greina slíkt á jafn fjölmennum tónleikum og Madonna heldur yfirleitt. Annars virðist A-Rod hafa aflað sér töluverðra óvinsælda heimafyrir með sambandi sínu við Madonnu enda sjálfur í hjónabandi. Saga hans er óneitanlega farin að minna eilítið á sögu hálfnafna hans, K-Fed.