Sigurður Tómas stýrir undirbúningi að nýju saksóknaraembætti

Sigurður Tómas Magnússon, sérfræðingur við lagadeild Háskólans í Reykjavík, hefur verið ráðinn til að stýra undirbúningi að stofnun nýs embættis héraðssaksóknara. Samkvæmt lögum um meðferð sakamála sem samþykkt voru á Alþingi í vor verður ákæruvaldið þrískipt og skal embætti héraðssaksóknara taka til starfa 1. janúar 2009.

Fram kemur í tilkynningu dómsmálaráðuneytisins að undirbúningur hefjist nú þegar og mun verkefnastjóri meðal annars skila tillögum til ráðuneytins um starfsmannafjölda, tilfærslu starfa frá öðrum embættum, uppbyggingu embættisins í stórum dráttum, fjárþörf, húsnæðismál, upplýsinga- og tölvukerfi og önnur atriði, eftir því sem verkinu miðar. Þá á verkefnisstjórinn að gera tillögur að nauðsynlegum breytingum á lögum, reglum og reglugerðum vegna hins nýja embættis.

Embætti héraðssaksóknara er ætlað að taka ákvörðun um saksókn á fyrsta stjórnsýslustigi í nánast öllum meiri háttar sakamálum. Samkvæmt lögunum er gert ráð fyrir því að héraðssaksóknara til aðstoðar verði varahéraðssaksóknari og saksóknarar en ráðherra ákveður fjölda þeirra í samráði við ríkissaksóknara. Við embættið skal vera sérstök deild skatta- og efnahagsbrota.