Aðalatriðið er Englandsmeistaratitillinn

Rafa Benítez, knattspyrnustjóri Liverpool, segir að sitt æðsta markmið sé að binda enda á bið félagsins eftir Englandsmeistaratitlinum.

Átján ár eru síðan Liverpool varð Englandsmeistari en það gerðist síðast 1989-90 þegar Kenny Dalglish stýrði liðinu til sigurs í gömlu 1. deildinni.

„Ef það tekst verður það stærsta afrek sem ég hef náð á mínum ferli,"sagði Benítez en hann segir erfiðara að vinna ensku deildina en þá spænsku. Hann er um þessar mundir að þræða leikmannamarkaðinn til að styrkja lið sitt.