Forsætisráðherra telur botninum náð

Formaður Framsóknarflokksins, sem hóf umræðuna, bauð þjóðarsátt og þjóðstjórn til að forða þjóðarvoða. Guðni Ágústsson sagði að það mikilvægasta við þessara aðstæður væri að auka útflutningstekjur og gagnrýndi Samfylkinguna fyrir að vilja rústa íslenskan matvælamarkað með tollalækkunum og að leggjast gegn nýjum álverum í Helguvík og við Húsavík.

Gengishækkun krónunnar í dag um tæp þrjú prósent og verðhækkun hlutabréfa um tvö og hálft kættu forsætisráðherra, sem sagði þetta benda til þess að botninum væri náð.

Formaður Vinstri grænna sagði að ríkisstjórnin hefði þurftu að grípa til aðgerða fyrir löngu. Steingrímur J. Sigfússon sagði að óhjákæmilegar björgunaraðgerðir yrðu þar af leiðandi miklu dýrari en ef til þeirra hefði verið gripið fyrir þremur vikum. Hann sagði að þagga þyrfti niður evrutal Samfylkingarinnar og spurði hvort það væri ekki nauðsynlegur hluti efnahagsaðgerða að fá hana til að þegja í hálft ár enda hefði hún ekkert annað fram að færa en einhliða upptöku evru.

Formanni Samfylkingarinnar varð hugsað til efasemda eins ræningjanna þriggja í Kardemommubænum um að ræna Soffíu frænku, til að sjá um tiltektina, því hún væri alltaf svo reið. Engu að síður hefði hún verið sótt. Steingrímur J. Sigfússon hefði hins vegar ekki verið sóttur til þess að taka til þar sem hann hefði ekki trúverðugleika í tiltektinni.