Nígeríusvindlarar nýta sér nafn Barnahjálpar SÞ

Fjármunabrotadeild lögreglunnar á höfuðborgarsvæðinu varar við tölvupósti sem virðist við fyrstu sýn stafa frá Barnahjálp Sameinuðu þjóðanna, UNICEF.

Í tilkynningu frá lögreglunni segir að sendandinn segist stýra verkefni innan Evrópusambandsins vegna skyndilegra fuglaflensutilfella innan vissra hluta Evrópusambandsins. Bandarískir samstarfsaðilar hafi greitt honum í formi bandarískra tékka en hann hafi ekki getað vegna anna stofnað bankareikning í Bandaríkjunum til að innleysa þessa fjármuni.

Af þeim sökum bjóði hann viðtakanda tölvupóstsins að gerast milligöngumaður um móttöku og innlausn þessara fjármuna. Fyrir vikið geti viðkomandi aðili fengið í sinn hlut allt að finn þúsund dollara þóknun fyrir tveggja til þriggja vikna vinnu. Lögregla segir augljóslega um að ræða svokallaðan Nígeríupóst og varar við gylliboðum sem þessum.