Hækka vörur sem hafa verið keyptar fyrir gengislækkun

Vörur sem keyptar voru fyrir gengislækkun krónunnar fyrir páska hafa verið hækkaðar að sögn fólks sem haft hefur samband við Neytendasamtökin síðustu daga.

Þá eru dæmi um að seljendur hafi kroppað gamla verðmiðann af vöru fyrir framan viðskiptavini og síðan selt vöruna á nýju og hærra verði. Neytendasamtökin segja á heimasíðu sinni að það sé með öllu óviðunandi að seljendur hækki verð á vörum með slíkum hætti. Neytendasamtökin hvetja seljendur til að stilla hækkunum í hóf og leita allra leiða til hagræðingar. Minnt er á að neytendur hafa sárasjaldan upplifað lækkun á vöruverði þegar gengi krónunnar styrkist. Megi því ætla að íslenskir neytendur eigi eitthvað inni.

„Samtökin hafa einnig fengið nokkur mál þar sem umsamið verð á vöru eða þjónustu hefur hækkað eftir að samningur var gerður. Þetta á t.d. við um innfluttar vörur sem kaupandi hefur pantað og jafnvel greitt að hluta. Hafi seljandi ekki gert fyrirvara í tilboði sínu er honum ekki heimilt að hækka verð. Því miður virðist slíkt þó algengt um þessar mundir," segir enn fremur á veg Neytendasamtökin.