Hughes nýtur stuðnings eiganda City

Eigandi Manchester City segir að Mark Hughes knattspyrnustjóri njóti hans fyllsta stuðnings en Hughes fundaði með stjórn félagsins í Abu Dhabi í dag.

City hefur ekki gengið sem skyldi á tímabilinu og er með þrettán stig eftir tólf leiki. Hughes hefur verið sagður óöruggur í starfi en Mansour Bin Zayed Al Nahyan segist bera fullt traust til Hughes.

„Mark hefur fullt leyfi til að koma sínum áætlunum í verk er varðar framtíðarhorfur félagsins til langs og skamms tíma," sagði Mansour. „Áætlun hans er mjög sannfærandi."

Fyrr í vikunni gaf félagið út þá tilkynningu að Hughes væri öruggur í starfi sínu en þetta var í fyrsta sinn sem Hughes hitti nýjan eiganda City að máli. Hann tók við City í júní síðastliðinn en Abu Dhabi United Group tók félagið yfir í september.