Áfram óeirðir í Danmörku - um 400 eldar á þremur kvöldum

Lögreglan í Kaupmannahöfn hefur handtekið tíu manns í eftirmiðdaginn og í kvöld í tengslum við óeirðir og elda sem kveiktir hafa verið til þess að mótmæla endurbirtingu mynda af Múhameð spámanni í dönskum blöðum í síðustu viku.

 

Fyrst og fremst hefur verið kveikt í ruslagámum eins og undanfarin fjögur kvöld en einnig í hjólhýsum, skúrum og húsum á leiksvæðum. Átta menn voru handteknir í Valby þar sem þeir voru að munda sig við að kasta mólotovkokkteilum í skóla í hverfinu. Þeir eru á aldrinum 15-18 og verið er að yfirheyra þá að sögn Jótlandspótsins.

 

Óróinn er þó ekki bundinn við Kaupmannahöfn því kveikt hefur verið í á fimm stöðum á Norður-Sjálandi. Auk þess hafa slökkvilið í meðal annars Slagelse, Óðinsvéum, Fredericia og Árósum glímt við minni háttar elda.

 

Lögreglan í Danmörku skráði í kringum 400 íkveikjur frá aðfaranótt föstudags til sunnudagsmorguns, en þær má rekja til óeirðanna.