Lagði út um hálfa milljón vegna morðsins á Bhutto

Fjórir menn eru í haldi vegna málsins og segja þeir allir að pakistanski talibaninn Baitullah Mehsud hafi skipulagt morðið, en Bhutto var ráðin af dögum í borginni Rawalpindi þann 27. desember síðastliðinn. Meðal þess sem Mehsud lagði út fyrir voru sjálfsmorðssprengjuvesti sem notuð voru í tilræðinu. Mehsud er sagður hafa tengsl við al-Qaida en hann gengur enn laus.

Tveir mannanna sem eru í haldi hafa þegar viðurkennt aðild að tilræðinu og segir yfirmaður rannsóknarinnar að enn eigi eftir að handtaka fjölda manns sem sé viðriðinn árásina.

Pakistönsk yfirvöld greindu frá því daginn eftir tilræðið að Mehsud hefði staðið á bak við árásina og komst bandaríska leyniþjónustan CIA að sömu niðurstöðu. Nýjar skoðanakannanir í Pakistan sýna hins vegar að meirihluti Pakistana telji að forsetinn Pervez Musharraf og ríkisstjórn hans hafi átt þátt í morðinu. Bhutto hafði nýverið snúið heim úr útlegð og hugðist taka þátt í þingkosningum í landinu þegar hún var myrt.