Leiðtogar í Kenýu verða ekki þvingaðir

Utanríkisráðherra Kenýa segir ekki hægt að þvinga ráðamenn þar í landi til að semja um lausn á deilunni um úrslit forsetakosninga í desember.

Odinga, leiðtogi stjórnarandstöðunnar, segir Kibaki forseta hafa stolið sigrinum. Miklar óeirðir brutust út og hafa þær kostað um þúsund manns lífið. Kofi Annan, fyrrverandi framkvæmdastjóri Sameinuðu þjóðanna, hefur reynt að miðla málum í deilunni. Þjóðarleiðtogar hafa hvatt til þess að samsteypustjórn beggja fylkinga verði mynduð.

Moses Wetangula, utanríkisráðherra, segir ekki hægt að þvinga Kenýmenn til að semja. Lausn deilunnar verði að koma frá þeim sjálfum. Condoleezza Rice, utanríkisráðherra Bandaríkjanna, er væntanleg til Kenýa á morgun til fundar við stjórn og stjórnarandstöðu.