Samkomulag um að sleppa fréttamönnum CBS í Írak

Samkomulag hefur náðst við mannræningja í Írak sem rændu tveimur fréttamönnum frá bandarísku sjónvarpsstöðinni CBS í Basra. Þetta sagði talsmaður sjíaklerksins Moqtada al-Sadr í dag.

CBS greindi frá því í gær að tveir af starfsmönnum fyrirtækisins, breskur blaðamaður og túlkur, hefðu horfið og sagði lögregla í Basra að mannræningjar hefðu rænt þeim á hóteli í borginni. Talsmaður al-Sadrs sagði hins vegar í dag að hans menn hefðu náð tali af mannræningjunum og að mönnunum tveimur yrði sleppt. Hann gaf þó ekki upp hvenær það yrði.

Basra er næststærsta borg Íraks. Barátta hefur verið í borginni á milli Mehdi-hersveita al-Sadrs og annars sjíahóps um völd í suðurhluta landsins og þar með olíulindum þar.