Útlit fyrir sigur Obama í Virginíu

Útlit er fyrir að öldungardeildarþingmaðurinn Barack Obama sigri í forskosningum demókrata í Virgínu í kvöld ef marka má útgöngusprár sem CNN birtir. Spennan er hins vegar mikil í baráttu repúblikananna John McCain og Mike Huckabee í sama fylki.

Forkosningar voru á þremur stöðum í dag, Virgínu, Maryland og höfuðborginni Washington og nágrenni. Kjörstöðum hefur verið lokað í Virginíu en verður klukkan eitt í Maryland og Washington.

Samkvæmt útgönguspám fær Barack Obama 57 prósent á mót 42 prósentum Hillary Clinton í Virginíu og sækir þar frekar í sig veðrið eftir sigra í fimm ríkjum um helgina. Samkvæmt skoðanakönnunum átti Clinton einna mesta möguleika í Virginíu af stöðunum þremur.

McCain hefur haft nokkuð gott forskot á helsta keppinaut sinn, Mike Huckabee, en Huckabee þykir eiga ágæta möguleika á stöðunum þremur í dag.