Hringdi af stöðinni og seig niður í reipi

Annþór Kristján Karlsson fékk að hringja á lögreglustöðinni við Hverfisgötu daginn áður en hann strauk, samkvæmt upplýsingum Fréttablaðsins. Ekki liggur ljóst fyrir hversu oft hann fékk að nota símann, en hann kvaðst vera að ráðfæra sig við lögmann sinn. Þetta er eitt fjölmargra atriða sem farið verður yfir í rannsókn á tildrögum stroksins. Annþór strauk snemma í gærmorgun.

Lögregla gerði mikla leit að Annþóri, sem stóð fram undir kvöld. Þá fannst hann í íbúðarhúsnæði í Mosfellsbæ, þar sem hann hafði falið sig inni í skáp. 

Að sögn Geirjóns Þórissonar yfirlögregluþjóns var Annþór í svokallaðri opinni gæslu í lögreglustöðinni. Í gærdag rann gæsluvarðhald hans út og átti hann þá að mæta fyrir héraðsdóm að nýju. Hann dvaldi í álmu sem ætluð er öðrum en þeim sem stungið er inn til að sofa úr sér. Í álmunni eru fimm klefar, gangur og lítil setustofa. Annþór var eini fanginn í álmunni.

Geirjón segir að af einhverjum ástæðum sem ekki voru ljósar í gær hafi klefi Annþórs ekki verið læstur yfir nóttina. Annþór hafi verið á sínum stað við athugun um fimmleytið í fyrrinótt. Um sjöleytið hefði hins vegar uppgötvast að hann hefði strokið. Hann hefði brotið rúðu úr öryggisplexigleri á ganginum og látið sig síga niður í kaðli. Spurður hvar hann hefði fengið kaðalinn sagði Geirjón að hann hefði komist inn í geymslu í álmunni.

„Þar fann hann smá kaðalspotta sem hann hefur náð að láta sig síga niður í," segir Geirjón og bætir við að ekki sé vitað hvernig Annþór komst inn í geymsluna.

Tveir menn voru í gær handteknir á höfuðborgar­svæðinu í tengslum við rannsókn lögreglunnar á flótta Annþórs. Þeir eru grunaðir um að hafa aðstoðað hann. Lögregla gerði húsleit á fjölmörgum stöðum í leit sinni að Annþóri áður en hann fannst. Það voru lögreglan á höfuðborgarsvæðinu og á Suðurnesjum, svo og tollverðir og sérsveit Ríkislögreglustjóra sem stóðu að aðgerðunum til að finna og handtaka Annþór í gær.