Kannast ekki við andstöðu við samningaviðræður við Landsvirkjun

Árni Mathiesen fjármálaráðherra sagði á Alþingi í dag að hann myndi ekki beita sér fyrir því að Landsvirkjun hætti virkjanaundirbúningi í neðri hluta Þjórsár og sagðist ekki kannast við að landeigendur væru andsnúnir samningaviðræðum við Landsvirkjun um bætur fyrir það land sem færi undir virkjanirnar þrjár í Þjórsá.

Það var Steingrímur J. Sigfússon, formaður Vinstri - grænna, sem tók málið upp í fyrirspurnartíma og benti á að ekki væri farið að ræða við landeigendur um bætur fyrir land þeirra vegna framkvæmdanna þrátt fyrir að byrjað væri að skipuleggja og hanna virkjanirnar þrjár, Hvammsvirkjun, Holtavirkjun og Urriðafossvirkjun.

Spurði hann fjármálaráðherra hvort hann sem yfirmaður Landsvirkjunar hygðist beita sér fyrir því að Landsvirkjun léti af frekari virkjanaundirbúningi í neðri hluta Þjórsár í ljósi andstöðu landeigenda og fleiri heimamanna og hvort ráðherra teldi við hæfi að fyrirtækið byði út hönnun á virkjanamannvirkjum í landi sem ekki hefði verið samið um afnot af.

Árni M. Mathiesen fjármálaráðherra sagðist líta svo á að Landsvirkjun þyrfti að fara fram af kurteisi og nærgætni á þessum slóðum sem annars staðar. Staða málsins væri hins vegar sú að snemma á síðustu öld hafi 95 prósent af virkjanaréttindunum verið seld og í flestum tilvikum samið um aðgang að landinu og hvernig ætti að bæta mönnum skaða.

Sagði hann forsendur fyrispurnarinnar enn fremur rangar því samkvæmt hans upplýsingum hefði ekki orðið vart við að bændur vildu ekki semja við Landsvirkjun um land sitt. Hann ætti ekki von á vandamálum því tengdu.

Björgvin G. Sigurðsson, þingmaður Samfylkingarinnar, sagði forsendur fyrir eignarnámi á svæðinu brostnar þar sem fram hefði komi þverpólitísk andstaða gegn eignarnámi á því svæði sem virkjarnirnar þrjár næðu til. Framkvæmdin hefði áhrif á 30 bændur og 4 ferkílómetra lands og ef ekki næðust samningar við bændur væri úti um framkvæmdina.

Mörður Árnason, flokksbróðir Björgvins, benti enn fremur á að Landsvirkjun væri að ráðast í framkvæmdir án þess að hafa rannsóknarleyfi en fyrirtækið hefði gert rannsóknir og gefið út skýrslur í óleyfi.

Jón Bjarnason, þingmaður Vinstri - grænna, sagði að orkuna ætti að nota í stækkað álver Alcan í Straumsvík og spurði hvort ekki væri rétt að stoppa Landsvirkjun af, að minnsta kosti þar til kosið hefði verið um stækkun álversins í Hafnarfirði. Ef stækkunin yrði felld féllu framkvæmdirnar um sjálfar sig.

Guðjón Ólafur Jónsson, Framsóknarflokki, tók einnig til máls og benti á að Steingrímur J. hefði talið virkjanirnar með þeim hagkvæmustu sem gerðar yrðu í nóvember síðastliðnum en nú væri komið annað hljóð í strokkinn. Spurði hann hvað hefði valdið skoðanaskiptum Steingríms.

Steingrímur mótmælti þeim orðum fjármálaráðherra að ekki væri andstaða meðal landeigenda við samningaviðræður. Sagði hann ekki hægt að túlka orð ráðherra með öðrum hætti en að hann styddi framgöngu Landsvirkjunar. Sagðist hann nýverið hafa verið á fundi með heimamönnum sem óttuðust hugsanlegt eignarnám Landsvirkjunar og ráðherra ætti að gefa Landsvirkjun fyrirmæli um að stoppa ef ekki væri ætlunin að taka lönd eignarnámi.

Árni M. Mathiesen ítrekaði hann vissi ekki af andstöðu landeigenda við samningaviðræður og því væri forsenda spurningar Steingríms röng.