Útgáfu á breiðskífu Britney flýtt

Útgáfudegi Blackout, nýjustu breiðskífu Britney Spears, hefur verið flýtt um tæpar tvær vikur. Platan átti að koma út þann 13. nóvember en verður nú fáanleg þann 30. október. Talsmenn Jive Recors, útgáfufyrirtækis Spears, segja ákvörðunina tekna til að sporna við frekara ólöglegu niðurhali á lögum af plötunni sem lekið hefur verið út á netið.

Þá er Gimme More, fyrsta smáskífan af plötunni, að gera góða hluti og er komin í þriðja sæti á Billbord vinsældarlistanum en í síðustu viku sat lagið í 68. sæti.

Fleiri jákvæðar fréttir af Britney eru þær að lögfræðingar hennar óskuðu í gær eftir því að hún fengi aukinn umgengnisrétt við syni sína tvo og að þeir fengju að vera hjá henni yfir nótt. Máli hennar til stuðnings lögðu þeir fram upplýsingar um nokkur neikvæð lyfjapróf söngkonunnar.