Kynna aðalskipulagstillögur vegna Urriðafossvirkjunar

Náttúruverndarsamtök Íslands skora á Flóamenn að styðja við hreppsnefnd Flóahrepps í því að standa við nýja skipulagstillögu þar sem ekki er gert ráð fyrir Urriðafossvirkjun í neðri hluta Þjórsár. Skipulagstillögur með og án virkjunarinnar verða kynntar á íbúafundi í Flóanum í kvöld en ákveðið var að boða til hans eftir fund forsvarsmanna Flóahrepps og Landsvirkjunar um málið.

Sveitarstjórn Flóahrepps samþykkti á fundi sínum þann 13. júní drög að aðalskipulagi fyrir hreppinn þar sem ekki er gert ráð fyrir Urriðafossvirkjun líkt og í eldra aðalskipulagi. Ástæðan fyrir því var sú að sveitarstjórnarmenn töldu ekki nægan ávinning af virkjuninni og að hún myndi valda óbætanlegum skaða á náttúru svæðisins.

Við þau tíðindi óskuðu Landsvirkjunarmenn eftir fundi með hreppsnefndinni þar sem meðal annars var rætt hvernig ýmis fórnarkostnaður vegna virkjunarinnar yrði bættur. Í framhaldinu var ákveðið að boða til íbúafundar og fer hann fram í félagsheimilinu Þjórsárveri klukkan 20.30 í kvöld. Þar verða aðalskipulagsdrög með og án Urriðafossvirkjunar kynnta.

Að sögn Aðalsteins Sveinssonar, oddvita Flóahrepps, er ætlunin að heyra hvað íbúum hreppsins, sem eru hátt í 600, finnst um tillögurnar tvær og gefst þeim tækifæri til þess að koma skoðunum sínum á framfæri. „Við hlustum á allar skoðanir en það gefur auga leið að við getum ekki tekið tillit til allra. Við erum ekki búin að loka á neitt," segir Aðalsteinn.

Í framhaldi af fundinum í kvöld tekur sveitarstjórnin málið fyrir aftur og ákveður hvaða drög verða kynnt nágrannasveitarfélögum og sömuleiðis auglýst eins og lög gera ráð fyrir.

Niðurstaða hreppsnefndar mikilvæg fyrir verndun Þjórsár

Í yfirlýsingu sem Náttúruverndarsamtök Íslands senda frá sér í dag vegna íbúafundarins í kvöld segir að niðurstaða hreppsnefndarinnar sé mikilvæg fyrir verndun Þjórsár og Flóamönnum til sóma. Jafnframt telja samtökin óeðlilegt að Landsvirkjun beiti sveitarstjórnir þrýstingi í skipulagsmálum, meðal annars með gylliboðum um almannaframkvæmdir á svæðinu.

Urriðafossvirkjun er sú stærsta af þremur virkjunum sem Landsvirkjun áformar í neðri hluta Þjórsár, 125 megavött af afli. Henni fylgir jafnframt stærsta uppistöðulón þessara virkjana, nefnt Heiðarlón. Þjórsárvirkjunum var ætlað að afla orku vegna stækkaðs álvers í Straumsvík en þótt þau áform virðist nú frá lítur Landsvirkjun engu að síður á þessa virkjanir í sveitum Suðurlands sem nærtækasta virkjanakost sinn.