Ekki heimsk eins og Lindsay og Paris

Partýgellan og American Pie leikkonan Tara Reid segir fólk aldrei koma til með að lesa fréttir af því að hún hafi komist í kast við lögin. „Ég er ekki heimsk eins og Lindsay Lohan og Paris Hilton," segir hún kokhraust.

Tara, sem hefur látið gera raunveruleikaþátt um skemmtanalíf sitt, segist ekki lengur tilbúin til að hætta ferli sínum fyrir djammið. „Vinnan hefur forgang hjá mér. Ég myndi aldrei gera samskonar hluti og Paris og Lindsay gera og ég á auk þess fullt af góðum vinum, ólíkt þeim."

„Mér finnst Lindsay og Paris þurfa að taka sig svolítið á og fjárfesta í gáfulegri hlutum. Svo ættu þær að skipta um vinahóp til að forðast vandræði. Ég mun aldrei verða uppvís af því að fara á djammið þegar ég er í vinnutörn og myndi aldrei mæta drukkin í tökur eða missa dag úr vinnu," segir hið 31 árs gamla samkvæmisljón hokið af reynslu.