Segja að stjórnendur Icelandair beri alla ábyrgð á töfum

Flugmenn segjast ekki bera ábyrgð á þeim töfum sem hafa orðið á millilandaflugi Icelandair í dag. Þetta kemur fram í yfirlýsingu frá Félagi íslenskra atvinnuflugmanna. Segja þeir ábyrgðina alfarið liggja hjá stjórnendum Icelandair. Flugi til Stokkhólms var aflýst í morgun og þá hefur einnig flugi til Minneapolis í Bandaríkjunum nú síðdegis verið aflýst.

Fram kemur í yfirlýsingu Félags íslenskra atvinnuflugmanna að þeir hafi ítrekað reynt að ná samkomulagi við stjórnendur Icelandair Group um forgangsréttarákvæðið í kjarasamningum. Deilan snúst fyrst og fremst um að á sama tíma og 49 íslenskum flugmönnum sé sagt upp störfum notfæri móðurfyrirtækið sér leiguflugmenn til að manna vélar í rekstri á vegum fyrirtækisins. Með þessu sé gerð gróf aðför að réttindum íslensks launafólks og félagsmönnum.

Flugmenn vísa allri ábyrgð vegna tafa á millilandaflugi á hendur stjórnenda Icelandair. Í yfirlýsingunni segir ennfremur að kröfur flugmanna sé ekki óeðlilegar og hindri ekki útrás félagsins. Þá harmar félagið þau óþægindi sem farþegar hafa orðið fyrir.

Aflýsa þurfti til Stokkhólms í morgun og voru farþegar sendir með vél til Osló sem síðan hélt áfram til Stokkhólms. Þeir sem ekki komust með þá voru sendir með vél til Kaupmannahafnar í hádeginu. Nú síðdegis var aflýst flugi til Minneapolis í Bandaríkjunum og þá hafa orðið frekari tafir á vélum til og frá Íslandi.

Guðjón Arngrímsson, upplýsingafulltrúi Icelandair, sagði í samtali við Vísi viðbúið að frekari tafir verði á millilandaflugi til og frá landsins í dag og á næstu dögum. Hvetur hann farþega að fylgjast vel með á heimasíðu félagsins.