Framlengja leyfi til að miðla persónuupplýsingum til Bandaríkjanna

Persónuvernd hefur tímabundið framlengt leyfi flugfélagsins Icelandair ehf til að miðla ýmsum persónuupplýsingum farþega sinna til heimavarnarráðuneytis Bandaríkjanna. Leyfið gildir til 31. júlí næstkomandi.

Fram kemur á heimasíðu Persónuverndar að leyfið sé veitt á grundvelli sjónarmiða um brýna almannahagsmuni þar sem að öðrum kosti Icelandair hafi á hættu að verða neitað um lendingarleyfi í Bandaríkjunum.

Um er að ræða upplýsingar úr farþegakerfum flugfélagsins. Sem dæmi nöfn, símanúmer, netföng og heimilisföng auk ýmissa upplýsinga tengdum ferðalaginu sjálfu og bókun þess.

Á heimasíðu persónuverndar kemur einnig fram að lögð sé áhersla á að um tímabundið leyfi sé að ræða og Icelandair sé skylt að uppfræða farþega um þetta áður en þeir kaupa miða.

Guðjón Arngrímsson, upplýsingafulltrúi Icelandair, sagði í samtali við Vísi að Bandaríkjamenn hefðu gert þessar kröfur allt frá árásunum 11. september árið 2001. Leyfið sé framlengt tímabundið þangað til fundin verði framtíðarlausn í málinu.