Sölumenn SS í samúðarverkfalli

Tíu til tólf sölumenn hjá Sláturfélagi Suðurlands mættu ekki til vinnu í morgun og báru við veikindum. Heimildir Vísis herma að sölumennirnir séu ósáttir við að sölustjóra þeirra hafi verið sagt upp. Forstjóri SS segir þetta valda ákveðinni truflun hjá fyrirtækinu en segist ekki vilja ætla mönnum það að þeir geri sér upp veikindi.

„Ég vil ekki ætla fólki að það segi ósatt," segir Steinþór Skúlason forstjóri SS aðspurður hvort eitthvað annað en tilviljun valdi því að nær allir útisölumenn fyrirtækisins liggi nú veikir heima. Steinþór staðfestir að í kjölfar skipulagsbreytinga hafi Einari Viðari Gunnlaugssyni, sölustjóra framleiðsluvöru verið sagt upp. „Breytingarnar ollu því að staða hans var lögð niður, en það hafði ekkert með störf hans hjá Sláturfélaginu að gera," segir Steinþór. Hann bætir því við að hjá SS séu reglulega gerðar breytingar í starfsmannamálum eins og hjá öðrum fyrirtækjum.

Steinþór segist hins vegar ekki hafa orðið var við óánægju starfsmanna og segist hann ekki hafa trú á því að breytingarnar sem gerðar voru stefni heilsufari fólks í hættu, eins og hann orðar það. Hann segir það enda grafalvarlegt mál reynist um skipulagðar aðgerðir að ræða, þá væri um að ræða ólöglegt verkfall. „Við skulum bara vona að Eyjólfur hressist og að þessir haustkvillar gangi fljótt yfir," segir Steinþór að lokum.