Vinna gegn launamun og endurmeta kjör kvennastétta

Jóhanna Sigurðardóttir félagsmálaráðherra og Árni Mathiesen fjármálaráðherra hafa ákveðið að skipa þrjá starfshópa til þess að fylgja eftir markmiðum ríkisstjórnarinnar á sviði jafnréttismála í samræmi við stefnuyfirlýsingu ríkisstjórnarinnar. Hóparnir eiga að vinna gegn óútskýrðum launamun og endurmeta kjör svokallaðra kvennastétta.

Jóhanna kynnti málið á fundi ríkisstjórnar í morgun. Eftir því sem fram kemur á vef félagsmálaráðuneytisins mun félagsmálaráðherra skipa fimm manna starfshóp sem ætlað er meðal annars að leita leiða til að eyða óútskýrðum launamun kynjanna á almennum vinnumarkaði ásamt því að jafna stöðu kvenna og karla í nefndum og stjórnum stofnana og fyrirtækja. Auk fulltrúa stjórnvalda verður óskað tilnefninga frá samtökum aðila á almennum vinnumarkaði til setu í starfshópnum.

Þá mun félagsmálaráðherra skipa sjö manna starfshóp sem hefur það hlutverk að vera ráðherra til ráðgjafar um framvindu verkefnisins og mun vinna eða láta vinna mat á raunverulegum árangri aðgerða. Óskað verður tilnefninga frá Háskóla Íslands, Háskólanum á Bifröst, Háskólanum í Reykjavík, Jafnréttisstofu, Jafnréttisráðs og Kvenréttindafélagi Íslands í hópinn.

Fjármálaráðherra skipar svo hóp sem hefur það meginverkefni að setja fram áætlun um að minnka óútskýrðan launamun kynjanna á opinberum vinnumarkaði með það að markmiði að hann minnki um helming á kjörtímabilinu. Hópurinn á einnig að endurmeta kjör kvenna hjá hinu opinbera, einkum þeirra stétta þar sem konur eru í miklum meirihluta. Auk fulltrúa stjórnvalda verður óskað tilnefninga frá samtökum aðila hjá hinu opinbera til setu í starfshópnum.

Fulltrúar ráðherranna ásamt formönnum framangreindra þriggja starfshópa munu síðan starfa saman að því að samhæfa störf hópanna og fara yfir tillögur þeirra, eftir því sem segir í tilkynningu ráðherra.