Hótuðu að senda barnaníðing á son hans

27 ára gamall karlmaður, Sigurður Fannar Þórsson, var í gær dæmdur í 44 mánaða fangelsi í Héraðsdómi Reykjavíkur fyrir að hafa flutt til landsins tæp þrjú kíló af kókaíni. Sigurður var handtekinn 21. nóvember í fyrra við komuna frá Kaupmannahöfn. Efnin fundust í fölskum botni ferðatösku hans en fíkniefnahundur tollgæslunnar varð þeirra var.

Sigurður játaði fyrir dómi að hafa flutt kókaínið til landsins. Hann sagði innflutninginn hafa verið skipulagðan af mönnum hér á landi sem hann vildi ekki nafngreina af ótta við hefndir gegn honum eða hans nánustu.

Hann kvaðst hafa verið í mikilli kannabisneyslu árin fimm á undan, auk þess sem hann neytti kókaíns annað veifið. Hann hafi skuldað fíkniefnasölum um eina milljón króna.

Í september á síðasta ári ákvað Sigurður að flýja vandræði sín og setjast að í Svíþjóð. Fljótlega fór hann að hafa áhyggjur af að lánadrottnar hans myndu hafa uppi á honum eða gengju að fjölskyldu hans. Því sneri hann aftur til Íslands til að útkljá sín mál. Lánardrottnar hans kröfðust þess að hann færi umrædda ferð og flytti efnin til landsins til að gera upp skuldina.

Þegar hann hafi neitað hafi hann verið barinn, bundinn á höndum og fótum, stungið í farangursrými bifreiðar og látinn dúsa þar yfir nótt. Barsmíðunum var svo fram haldið daginn eftir og hnífur borinn að hálsi hans. Þá var Sigurði tjáð að barnaníðingur yrði sendur á son hans ef hann færi ekki að vilja mannanna.

Í niðurstöðu dómsins segir að Sigurði hefði verið fullljóst að kókaínið hefði verið ætlað til sölu í ágóðaskyni. Dómurinn tók tillit til þess að hann hefði flutt efnin til landsins undir þrýstingi. Þá var til þess tekið að þetta var fyrsta refsibrot hans.