Benedikt hálfnaður með Drangeyjarsundið

Sjósundkappinn Benedikt S. Lafleur er nú tæplega hálfnaður í Drangeyjarsundi sínu og fetar þar í kjölfar Grettis Ásmundarsonar fornkappa. Viggó Jónsson, fréttaritari Stöðvar 2 á Sauðárkróki, fylgir Benedikt eftir og í samtali við Vísi sagði hann að sundið gengi vel.

„Það hefur verið vestankaldi á okkur en sjólaust og hann lætur það ekki á sig fá,“ sagði Viggó. Benedikt stakk sér til sunds frá Drangey laust eftir klukkan eitt í dag og er reiknað með að hann komi á land á Reykjum á Reykjaströnd milli klukkan fjögur og fimm, en þetta er um sjö kílómetra vegalengd. Til stóð að Benedikt synti Drangeyjarsund í fyrradag en þá varð hann frá að hverfa vegna vaxandi vinds.

Þess má geta að aðalfylgdarmaður Benedikts í dag er sjálfur Drangeyjarjarlinn, Jón frá Fagranesi, en hann hefur mikla reynslu af fylgd Drangeyjarfara og sjósundkappa sem synt hafa frá og í eyjuna.

Aðeins nokkrir kappar hafa synt þetta sund sem einnig hefur verið kennt við Gretti Ásmundarson. Síðastur til að synda milli Drangeyjar og lands var Kristinn Magnússon árið 2004. Þá var hann að fara í annað sinn en í fyrra skiptið, árið 1998, synti hann vegalengdina á aðeins tveimur tímum og tíu mínútum.