Af hverju ertu svona blár?

Paul Karason er ósköp venjulegur maður búsettur í Kalíforníu í Bandaríkjunum. Eitt er þó sem aðskilur Paul frá flestum öðrum, hann er blár á litinn. Maðurinn, sem er 57 ára gamall og gæti verið af íslenskum ættum ef litið er til eftirnafns hans, segir að hann hafi skipt um lit fyrir um fjórtán árum síðan. Áður var hann ljós á hörund og freknóttur.

„Breytingin gerðist á löngum tíma þannig að ég tók ekkert eftir þessu og foreldrar mínir ekki heldur," segir Paul í viðtali við CNN. „Það var ekki fyrr en vinur minn sem hafði ekki séð mig í marga mánuði kom í heimsókn og spurði mig strax hvað ég hefði eiginlega gert." Læknar segja að ástæðu blánunarinnar megi rekja til þess að Paul stundar það að drekka vatnsblöndu sem blandað er með því að leiða rafstraum í gegnum silfur með sérstöku tæki þannig að silfrið blandast vatninu.

Þessi görótti drykkur á að laga öll mein og Paul er handviss um að þetta virkar. Hann lætur aukaverkunina heldur ekkert stoppa sig í því að halda áfram silfurdrykkjunni, þó hann segist nú hafa dregið töluvert úr henni. Hann segist heldur ekki viss um að það sé drykkjan sem hafi þessi áhrif heldur er hann á því að bláminn hafi lagst á hann þegar hann tók upp á því að þvo sér upp úr leginum.

Paul býr nú í Kalíforníu en þangað fluttist hann frá Oregon nýlega. Ástæðuna fyrir því segir Paul vera þá að í Kalíforníu eigi hann auðveldara með að falla inn í fjöldann.

Hér má sjá umfjöllun CNN um blámanninn.