REI, REI, ekki um jólin

Starfsfólk nokkurra deilda Orkuveitunnar gerði sér glaðan dag á Jólahlaðborði á föstudaginn var. Hefð hefur myndast fyrir keppni um besta skemmtiatriðið á hlaðborðinu og í ár var það sölu- og markaðsdeildin sem sló allt út.

Þeir hafa útbúið myndband þar sem sungið er jólalagið "Nei, nei, ekki um jólin" með nýjum texta sem nú útleggst, "REI, REI, ekki um jólin". Textinn fjallar um starfsmann Orkuveitunnar sem hefur fengið nóg af umræðunni um málefni Orkuveitunnar og REI og biður sér vægðar yfir hátíðarnar.

Í myndbandinu koma allir helstu forkólfar Orkuveitunnar fram auk þeirra stjórnmálamanna sem hafa mest látið til sín taka í rifrildinu um fyrirtækið. Þannig má sjá Guðmund Þóroddsson, forstjóra REI, Bjarna Ármannsson, stjórnarformann REI, Svanhildi Svavarsdóttur, Kjartan Magnússon og Björn Inga Hrafnsson taka undir í laginu þar sem þau öll óska sér það heitast að menn hvíli sig á REI-málinu fram í janúar.

Þó vantar nokkra aðalleikendur úr REI-málinu í myndbandið, kannski helst þá félaga Vilhjálm Þ. Vilhjálmsson, fyrrverandi borgarstjóra og Hauk Leósson, fyrrverandi stjórnarformann OR.

Í aðalhlutverki er hins vegar Loftur Már Sigurðsson, viðskiptastjóri í söludeild OR sem fer með aðalhlutverkið í þessu bráðskemmtilega myndbandi.