United á toppinn eftir sigur á Liverpool

Manchester United komst á topp ensku úrvalsdeildarinnar með 1-0 sigri á Liverpool á Anfield Road í dag.

Sigurinn var ef til vill ekki sanngjarn af því leyti að Liverpool var meira með boltann og átti mun fleiri skot á markið. En það var Carlos Tevez sem skoraði eina mark leiksins og þökk sé því og sterkum varnarleik United hirtu gestirnir öll stigin.

Rafael Benitez hélt sér við byrjunarliðið sem gjörsigraði Marseille í vikunni og hefður það sjálfsagt komið einhverjum á óvart.

Alex Ferguson, stjóri Manchester United, skipti hins vegar nánast út öllu byrjunarliðinu frá leiknum við Roma í Meistaradeildinni enda var sá leikur þýðingalaus. Aðeins Wayne Rooney hélt sæti sínu í liðinu.

Owen Hargreaves hafði einnig jafnað sig á meiðslum sínum og var við hlið Anderson á miðju United.

Leikurinn fór heldur rólega af stað en spennan var þó óneitanlega mikil. George Gillett og Tom Hicks, eigendur Liverpool, voru á vellinum og hafði það ef til vill sín áhrif.

Eftir um hálftímaleik komust heimamenn nálægt því að skora. Boltinn féll fyrir fætur Harry Kewell sem skaut að marki en Brasilíumaðurinn Anderson bjargaði á marklínu.

Edwin van der Sar virtist ekki vera upp á sitt besta og var nærri því búinn að kosta liðið sitt mark eftir að hann rakst saman við samherja sína.

Undir lok hálfleiksins hins vegar voru það gestirnir sem skoruðu fyrsta og eina mark leiksins. United fékk horn, Ryan Giggs gaf á Wayne Rooney sem skaut að marki. Carlos Tevez var einn á auðum sjó og stýrði boltanum í netið af stuttu færi.

Það var án efa áfall fyrir Liverpool að fá markið á sig en liðið hafði engu að síður talsverða yfirburði í síðari hálfleik, án þess þó að skora jöfnunarmarkið.

Leikmenn Liverpool pressuðu stíft á vörn United og varð það til þess að United fékk gott færi úr skyndisókn. Patrice Evra hirti boltann á eigin vallarhelmingi, gaf á Ronaldo sem lagði boltann fyrir Rooney sem var í kjörstöðu til að auka forskot United. Hann hitti hins vegar ekki markið.

Það var engum blöðum um það að fletta að Liverpool var talsvert meira með boltann og stjórnaði leiknum, sérstaklega í síðari hálfleik. Það var hins vegar United sem skoraði eina mark leiksins og hirti þar með þau þrjú stig sem í boði voru.