30 hreinar meyjar, úlfaldi og tjald

Muammar Gaddafi Líbíuforseti á ýmislegt ólært í listinni að pakka létt. Þegar hershöfðinginn mætti í opinbera heimsókn sína til Frakklands fylgdu honum fjögur hundruð manns, tjald og kameldýr.

Oft fylgir þjóðhöfðingjum her þungvopnaðra karlkyns lífvarða í svörtum jakkafötum. Gaddafi ferðast hinsvegar með þrjátíu konum í bláum einkennisbúningum, sem eru að sögn allar hreinar meyjar. Ekki dugði minna en fimm flugvélar til að ferja Gaddafi og fylgdarlið til Parísar. Þegar þangað var komið skundaði hópurinn á Hotel de Marigny, en í garði þess mun Líbíuforsetinn reisa tjald sitt. Og geyma kameldýrið, sem var tekið með svo Gaddafi gæti tekið á móti gestum á hefðbundinn hátt Bedúína. Meyjarnar hreinu, sem eru þjálfaðar til að drepa, munu svo gæta öryggis forsetans á öllum stundum.

Þetta fyrsta heimsókn Gaddafis til Frakklands síðan 1973. Nicolas Sarkozy Frakklandsforseti bauð Gaddafi til landsins eftir að hann tók þátt í samningaviðræðum um lausn fimm Búlgarskra hjúkrunarfræðinga og læknis sem voru dæmd til dauða í Líbýu fyrr í ár.

Þó Gaddafi eldri hafi ekki komið til Frakklands í 34 ár, hefur Hannibal sonur hans vakið mikla athygli þar - og ekki alla jákvæða.

Fyrir tveimur árum olli samkvæmisljónið, þá 26 ára, meiriháttar milliríkjavandræðum þegar hann var handtekinn grunaður um að hafa kýlt ófríska kærustu sína og eyðileggja hótelherbergi. Sex mánuðum áður hafði hann verið handtekinn fyrir að keyra Porche bílinn sinn á 112 kílómetra hraða niður Champs-Elysees. Tveim árum áður var Hannibal handtekinn í Róm á Ítalíu fyrir að ráðast á þrjá lögreglumenn með slökkvitæki meðan hann var þar í fríi. Hann slapp án ákæru frá öllum atvikunum, þar sem hann nýtur diplómatískrar friðhelgi.