Doktor Luka borgar meðlag

Króatíski leikarinn Goran Visnjic hefur fallist á að greiða meðlag með átta mánaða gömlu stúlkubarni.

Mirela Rupic, sem er 36 ára gömul og býr í Zagreb í Króatíu, höfðaði mál til að fá leikarann til að gangast við barninu. Visnjic hefur verið kvæntur síðan 1999. Þau hjónin ættleiddu barn fyrr á þessu ári.

Í fyrstu vildi hann ekki gangast við barninu og krafðist DNA prufu. Fyrir rétti í Zagreb sagði hinsvegar lögfræðingur hans að hann hefði fallið frá þeirri kröfu.

Hann væri reiðubúinn að gangast við barninu og greiða með því meðlag. Sjálfur mætti nýi pabbinn ekki fyrir rétt, aðeins lögfræðingur hans.