Olíuleki út frá pakkningu leiddi til þess að þrýstingur féll

Fokker-flugvél Flugfélags Íslands, sem þurfti nauðlenda á Egilsstaðaflugvelli í gærkvöld, heldur til Reykjavíkur síðar í dag. Í ljós hefur komið að olíuleiki út frá pakkningu varð þess valdandi að olíuþrýstingur í öðrum hreyfli vélarinnar féll skömmu eftir að hún lagði upp frá Egilsstöðum. Gripu flugmenn vélarinnar á það ráð að snúa aftur til Egilsstaða og nauðlenda vélinni þar.

Að sögn Árna Gunnarssonar, framkvæmdastjóra Flugfélags Íslands, fóru flugvirkjar á vegum félagsins austur á Egilsstaði í morgun og skoðuðu vélina þar sem orsök óhappsins kom í ljós. Segir Árni að skipt verði um pakkninguna sem lak og verður vélinni flogið til Reykjavíkur síðar í dag. Hann á von á því að hún fari þá aftur í áætlunarflug.

Aðspurður segir Árni að flugmennirnir hafi brugðist hárrétt við. „Við fórum í gærkvöld og morgun yfir þessi mál og þeir fóru í öllu eftir þeim verkferlum sem gilda þegar þessar aðstæður koma upp," segir Árni.

Atvikið í gær er það annað sem kemur upp hjá félaginu á rúmri viku. Í síðustu viku var slökkviliðið á Akureyri sett í viðbragðsstöðu eftir að framrúða í flugvél Flugfélagsins brotnaði skyndilega í aðflugi að flugvellinum á Akureyri.

Aðspurður hvort einhverjar breytingar hefðu orðið á eftirliti með flugvélum félagsins sagði Árni svo ekki vera. Tilviljun ein réði því að þessi mál kæmu upp með svo stuttu millibili en slælegu eftirliti væri ekki um að kenna.