Bauð fimm hundruð glæpamönnum í veislu hjá Ozzy Osbourne

Uppátækjasamur lögregluforingi bauð 500 eftirlýstum glæpamönnum í partý hjá Ozzý Osbourne. 30 þeirra mættu og voru handteknir á staðnum. Ozzy sjálfum finnst hann hinsvegar hafa verið misnotaður.

Óhefðbundnar aðferðir lögreglustjórans Paul Laney fóru svo fyrir brjóstið á Ozzy að hann krefst nú opinberrar afsökunarbeiðni. Laney bauð mjög einfaldlega 500 glæpamönnum í samkvæmi á Fargo næturklúbbnum, sem er steinsnar frá stað þar sem Ozzy hélt sama kvöld tónleika með Rob Zombie. Af boðskortinu mátti ráða að samkvæmið væri í tengslum við tónleikana.

Þrjátíu mannanna bitu á agnið og dúsa nú í fangageymslum.

,,Í stað þess að halda blaðamannafund og monta sig ætti hann að biðja mig afsökunnar á því að nota nafn mitt í tengslum við þessar handtökur." sagði í yfirlýsingu frá Ozzy. ,,Þetta er móðgun við mig og aðdáendur mína og sínir hversu lélegur þessi lögreglustjóri er í starfi sínu"

Laney fannst þó ekkert athugavert við aðferðina. ,,Við ætluðum aldrei að móðga herra Osbourne. Við beittum einungis mjög hugmyndaríkri aðferð til að fanga eftirlýsta glæpamenn"