Heimsins flottustu bossar

Undirfatafyrirtækið Sloggi telur sig hafa fundið flottustu bossa í heimi, á karlmanni og konu. Leitin hófst í sumar og mæltist misjafnlega vel fyrir. Í Danmörku var til dæmis gagnrýnin svo hörð að Danmörk var tekin út úr keppninni. Þar sögðu gagnrýnendur að verið væri að gera konur að söluvöru og útvega karlmönnum ókeypis myndir til þess að fróa sér yfir.

Enginn tók upp hanskann fyrir karlagreyin sem einnig gátu lagt sína bossa á netið og tekið þannig þátt í keppninni.

Engu að síður voru 43 þáttakendur frá 28 löndum í úrslitakeppninni. Og sigurvegararnir voru hin 19 ára gamla Kristina Dimotrova frá Búlgaríu og hinn 24 ára gamli Andrei Andrei frá Rúmeníu. Þar sem hér er aðeins mynd af sitjandanum á Kristinu er rétt að taka fram að þrátt fyrir að leitað væri á netsíðum fjölmargra erlendra blaða fannst enginn mynd af Andrei blessuðum.