Lippi gefur kost á sér á ný

Marcello Lippi hefur nú gefið það út að hann sé tilbúinn að fara að þjálfa á ný eftir að hafa tekið sér frí í rúmlega eitt ár. Hann stýrði síðast landsliði Ítala til sigurs á HM síðasta sumar.

Lippi vill hinsvegar alls ekki að menn fari að teikna hann í starf þjálfara AC Milan þar sem Carlo Ancelotti á nú nokkuð undir högg að sækja.

"Ég er ekki að hugsa um tiltekið félag enn sem komið er, en það eina sem er á hreinu er að mig langar að byrja að vinna aftur. Milan er þegar með frábæran þjálfara og frábæran einstakling á bekknum hjá sér," sagði Lippi í samtali við Gazetta dello Sport í dag.