Hudson vill fá Wilson aftur

Eftir að gamanleikarinn Owen Wilson reyndi sjálfsmorð fyrir skemmstu gerði fyrrverandi kærasta hans, Kate Hudson, sér grein fyrir því hversu mikið hún elskar hann og vill nú fá hann aftur að því er tímaritið People greinir frá.

Hudson átti í stuttu ástarsambandi við leikarann Dax Shepard eftir að hún hætti með Wilson í sumar en það samband fór út um þúfur þegar hún frétti af óförum Wilsons, þar sem hún gat hún ekki hugsað um neitt annað.

Hudson og Wilson kynntust við tökur á myndinni You, Me and Dupree en Hudson var ósátt við villt líferni leikarans og batt enda á sambandið. Wilson var miður sín og hefur því verið haldið fram að myndir sem hann sá af Hudson í örmum Shepard hafi meðal annars verið ástæða sjálfsmorðstilraunarinnar.