Mel B og Eddie Murphy mætast í dómssal

Kryddpían Mel B á stefnumót við barnsföður sinn Eddie Murphy um miðjan næsta mánuð og fer það fram í dómshúsi einu í Los Angeles. Parið fyrrverandi talast almennt ekki við en ætlunin er að ræða meðlagsfyrirkomulag og fleira í tengslum við sex mánaða dóttur þeirra Angel Iris.

Heimildamaður Daily Mirror segir að málsmeðferðin skipti Mel B miklu máli enda hefur Eddie ekki viljað vita af Angel hingað til. Eddie hætti með kryddpíunni þegar hún var komin fimm mánuði á leið og neitaði því að vera faðir stúlkunnar allt þar til DNA rannsókn leiddi sannleikann í ljós. Þrátt fyrir það hefur hann ekki virt hana viðlits og verður seint talinn fyrirmyndarfaðir.