Aniston háð vaxi

Jennifer Aniston er eins og mörgum er kunnugt mjög umhugað um hárið á sér. Hún sést sjaldan ótilhöfð og hefur fengið mikið lof fyrir makkann. Það sem færri vita er að Aniston er einnig mjög umhugað um þau hár sem ekki tilheyra höfðinu. Þegar kemur að þeim vill hún hins vegar sem minnst af þeim vita.

Snyrtifræðingurinn Dawn DaLuise segir leikkonuna hafa óskað eftir þjónustu sinni aðra hverja viku á meðan hún lék í Friends. „Hún bað aðallega um svokallað bikiní-vax en stundum voru engin hár til að fjarlægja. Hún vildi samt fá meðferðina og var jafnvel vön að plokka einstaka hár í burtu. Hún virtist haldin áráttu."

Það má velta því fyrir sér hvort snyrtifræðingurinn sé ekki að brjóta trúnað við góðan viðskiptavin en ekki fylgir sögunni hvað Aniston finnst um lausmælgi hans.