Árshátíð íslenskra hljómsveita í uppsiglingu

Iceland Airwaves tónlistarhátíðin hefst næstkomandi miðvikudag eins og flestir eflaust vita. Hátíðin er sú stærsta til þessa og hefur hún bæði stækkað að umfangi og virðingu með hverju ári, segir Eldar Ástþórsson, framkvæmdastjóri hátíðarinnar. Í ár troða um 200 hljómsveitir og tónlistarmenn upp og þar af eru um 50 erlend númer.

Hátíðin er orðin fastur liður hjá blaðamönnum og tónlistarfólki víðsvegar um heiminn og segir Eldar að von sé á 600 blaðamönnum frá öllum heimshornum. „Flestir koma frá Bandaríkjunum og Bretlandi en þó eru nokkrir sem koma alla leiðina frá Ástralíu og Japan," segir Eldar. „Auk þess velur til dæmis fólk á vegum ferða- og tískutímarita þennan tíma til að sækja landið heim enda mikið um að vera."

Aðspurður að því hvort einhver sérstakur dagur standi upp úr á hátíðinni segir hann að stærstu númerin troði upp á fimmtudag, föstudag og laugardag og í því sambandi nefnir hann hljómsveitirnar Of Monteal og Derhoof frá Bandaríkjunum og Bloc Party frá Bretlandi.

Eldar segir fjölda hljómsveita sækjast eftir því að fá að spila á hátíðinni. „Um 300 íslenskar hljómsveitir sóttu um en vísa þurfti um helmingnum frá þrátt fyrir að margar hafi verið frambærilegar." Hann segir hátíðina eins konar árshátíð íslenskra hljómsveita og að þar sé kjörið tækifæri til að koma sér á framfæri.

Hljómsveitin Retro Stefson tróð upp á litla sviðinu á Gauki á stöng í fyrra. Hin unga hljómsveit sem er skipuð 16 og 17 ára nemendum úr Austurbæjarskóla og MH hefur síðan spilað úti um víðan völl og treður upp á NASA á fimmtudagskvöldið. Unnsteinn Manuel Stefánsson, einn meðlimur hljómsveitarinnar, segir Iceland Airwaves hafa verið einskonar stökkpall og bindur miklar vonir við hátíðina í ár.

Sprengjuhöllin spilaði einnig á Gauki á stöng í fyrra og vakti mikla athygli. „Við erum mjög ánægðir með þá kynningu sem við fengum og höfum varla haft undan síðan," segir Bergur Ebbi Benediktsson, söngvari og gítarleikari. „Ég er mjög ánægður með hátíðina og hvernig að henni er staðið. Þetta er frábært tækifæri fyrir hljómsveitir sem vilja koma sér á framfæri og erum við mjög spenntir fyrir því að koma fram en líka fyrir því að sjá öll hin númerin."

Sprengjuhöllin treður upp á skemmtistaðnum Lídó á fimmtudagskvöldið en þess má geta að plata hljómsveitarinnar, Tímarnir okkar, kom út 10. október síðastliðinn og er mest selda plata landsins um þessar mundir. Hún er uppseld hjá útgefanda og er annað upplag væntanlegt í vikunni.