Ólöglegur einkadans enn í boði á Goldfinger

Súlustaðurinn Goldfinger býður viðskiptavinum sínum enn upp á einkadans að tjaldabaki, þrátt fyrir að slíkt sé bannað með öllu. Súlustaðurinn missti leyfi til að bjóða upp á nektasýningar af hvers kyns tagi í sumar og staðfesti sýslumaðurinn í Kópavogi það í samtali við Vísi í dag.

Blaðamaður á vegum Vísis heimsótti staðinn í gær. Þar mætti hann hópi föngulegra og fáklæddra kvenna sem þar voru til að bjóða viðskiptavinum þjónustu. Fljótlega gaf sig á tal við hann rússnesk þokkagyðja sem bauð honum upp á einkadans. Fyrst fimm mínútna dans á bak við tjöld og síðan tíu mínútna dans. Í bæði skiptin tók barþjónn staðarins við greiðslu sem var samtals 16 þúsund krónur.

Á meðan seinni dansinum stóð gaf sú rússneska blaðamanni símanúmer sitt og vildi ólm hitta hann utan vinnutíma. Þegar haft var samband við stúlkuna í dag vildi hún hins vegar eingöngu hitta blaðamanninn í lokuðu rými á Goldfinger.

Þegar blaðamaður spurði Ásgeir Davíðsson, eiganda Goldfingers, hvort að boðið væri upp á svokallaðan einkadans á staðnum hans neitaði hann því. Þegar blaðamaður sagði honum að hann hefði fengið slíkan dans í gær vísaði hann ábyrgðinni á stúlkuna sem bauð dansinn og barþjóninn sem tók við greiðslunni. Hann neitaði því alfarið að sú þjónusta sem hann byði upp á væri ólögleg.

Nú er til meðferðar hjá dómsmálaráðuneytinu stjórnsýslukæra Ásgeirs á hendur þeim sem stoppa vilja starfsemi súlustaða eins og Goldfinger.