Ætti að fjölga en ekki fækka í Írak

Siv Friðleifsdóttir segir utanríkisráðherra hafa sent alröng skilaboð með heimkvaðningu friðargæsluliða í Írak og nær hefði verið að fjölga þar í liði Íslendinga. Um stefnubreytingu sé að ræða í íslenskum utanríkismálum, sem utanríkisráðherra kannast hins vegar ekki við.

Ingibjörg Sólrún Gísladóttir utanríkisráðherra mætti á fund utanríkismálanefndar að ósk Sivjar Friðleifsdóttur í morgun, til að ræða ákvörðun ráðherrans að kalla eina friðargæsluliða Íslands heim frá Írak.Siv vill meina að þarna sé um stefnubreytingu að ræða, en þarna hafi verið verkefni sem Írakar sjálfir óskuðu eftir og byggi á ályktun öryggisráðs sameinuðu þjóðanna.

Á sama tíma og Íslendingar kölluðu starfsmanninn heim væri Ísland að sækja um aðild að Öryggisráði Sameinuðu þjóðanna. Íslenski fulltrúinn hefði tekið þátt í uppbyggingarstarfi, ekki stríðsrekstri.

Ingibjörg Sólrún Gísladóttir utanríkisráðherra segir ofsagt að um stefnubreytingu sé að ræða, að kalla heim mannesku sem hafi tekið þátt í að byggja upp öryggissveitir Íraka. Hún segir að það hafi verið hennar ákvörðun að standa öðruvísi að málum og það færi víðs fjarri að Íslendingar væru eina NATO þjóðin sem ekki væri með fólk í Írak.