Flugþjónustan tekur fyrsta evruposann í notkun

Fyrirtækið Kortaþjónustan hefur sett upp fyrstu posana hér á landi sem taka við evrum. Það var Flugþjónustan á Reykjavíkurflugvelli sem tók fyrstu posana í notkun en evruposar gagnast til að byrja með helst fyrirtækjum í ferðaþjónustu. Fleiri fyrirtæki hafa þegar beðið um að fá slíka evruposa. Þetta þýðir að viðskiptavinir fyrirtækjanna fá uppgefið verð vöru eða þjónustu í evrum og greiða í þeirri mynt.

„Sumir myndu segja að þetta væri fyrsta skrefið í átt að því að evruvæða greiðslukerfið hér á landi, en það er þó sennilega fullsnemmt að fullyrða um það. Engu að síður höfum við orðið varir við áhuga ýmissa fyrirtækja hér á landi fyrir þjónustu á borð við þessa enda hafa viðskiptavinir þeirra oft og tíðum talsvert hagræði af því að losna við að umreikna greiðslur í krónur," segir Jóhannes Ingi Kolbeinsson, framkvæmdastjóri Kortaþjónustunnar.