Lögregla kærð fyrir að beita harðræði við handtöku

Lögð hefur verið fram kæra á hendur lögreglunni fyrir að beita þrjá unga menn óeðlilega miklu harðræði. Drengirnir voru handteknir að tilefnislausu af vopnuðum sérsveitarmönnum sem beindu að þeim skotvopnum.

Kristín Edwald, lögmaður drengjanna, staðfestir að kæra hafi verið lögð fram til ríkissaksóknara auk þess sem bótakröfu hafi verið beint til ríkislögmanns. Hún vill að öðru leyti ekki tjá sig um málið að svo stöddu. Atvikið átti sér stað þann 23. júlí síðastliðinn í Kópavogi.

Samkvæmt heimildum Vísis voru drengirnir á ferð í bíl við verksmiðju Ora við Vesturvör þegar þeir voru stöðvaðir af lögreglu og vopnuðum sérsveitarmönnum. Þeim var umsvifalaust skellt í jörðina og þeir handjárnaðir á meðan byssum var beint að þeim. Að því loknu voru þeir færðir á lögreglustöð þar sem gerð var á þeim líkamsleit og þeir vistaðir um tíma í fangageymslu áður en í ljós kom að þeir voru alsaklausir. Eftir að í ljós kom að lögregla hafði gert mistök báðu hlutaðeigandi lögreglumenn þá afsökunar.

Drengirnir halda því fram að með því að beina að þeim byssum hafi lögregla beitt þá óeðlilega miklu harðræði.

Heimildir Vísis herma að lögregla hafi verið kvödd á svæðið í kjölfar þess að hvellir hafi heyrst í hverfinu sem einhverjir hafi álitið vera skothvelli. Því hafi sérsveitin verið kölluð til. Síðar mun hafa komið í ljós að unglingsdrengir, algjörlega ótengdir þeim handteknu, voru að leika sér með flugelda.